Bakit pa ba ako lalayo,
dito nga sa atin, kontrobersya’y lagong-lago,
Kontrobesyang si Carpio ang pasimuno,
Mahiwagang Ombudsman ang ahensyang nagpayo.
Ang sarap ng ulam pag may Ajinomoto,
Pero may isang storyang patungkol dito,
Doon sa lungsod ng Cagayan de Oro,
Tila sumpang bawal maging sangkap sa gintong kaldero.
Isang nakakagulat na pag-aanunsyo,
Ang bumulaga noong Nobyembre a-singko,
Si pinuno ay isa sa tatlo,
Na pinatatanggal at pinagbawalan ng tumakbo,
Sa anumang posisyon at serbisyo publiko.
Diba’t kay pait mapagtanto,
Na halalan ay paparating sa buwan ng Mayo,
Kung Siya ay isa sa tatlong pagpipilian mo,
Ay biglang mawala at sa mayoral race ay maglalaho,
Sino ang pipiliin mo, ang demonyo o ang demonyito.
Ngunit isang tanong ang sa akin nabubuo,
Bakit ngayon lang nalaman ng publiko,
Kung di pa dahil kay Carprio,
Ay bulag ang mga mamboboto,
Sa pawang na pangyayari sa likod ng puting palasyo.
Manahimik hangga’t sa pwede,
Itago, hangga’t pwedeng ikubli,
Maging bulag, pipi, at bingi,
Sa kasong isinampa ni Guillani.
Hay naku! Buhay na ka kay malas,
Ngunit suwerte para kay Ah C. Nas,
Bise ngayon, mayor bukas,
Isang panungkulang sa kisap-mata ay nagwakas!
Dito na naman tayo,
Humihingi ng makapangyarihang TRO,
Si Ombudsman ay walang husgado,
Kaya si CA ang bumayo ng status quo.
Bibong-bibo, ang pinunong Moh Rino,
Ngunit si Ah C. Nas ayaw patalo,
Kaya mga empleyado gulong-gulong,
Sa dalawang taong magkasalungat ang mga mandato.
Hayun naman sa kabilang dako, ating masilayan,
Ang tingkad ng liwanag na animo’y dalandan,
Kampo ng mga balimbing na magkakaibigan,
Sila’y nagkakagulo, tayo’y magtawanan.
Sabi ni FPJ, sayo ang Manila, sa akin ang Tondo,
Ikaw sa distrito, ako sa partido,
Ikaw sa barangay, ako sa konseho,
At sa darating na Mayo,
Buong pamilya ay tatakbo,
Eleksiyon parang Fun Run,
Si kuya, si kapatid, si bunso at si asawa ay nag-uunahan,
Kaya nga dapat pigilan,
Dinastiyang dilaw, lila at dalandan,
Bagong mukha, adhikain at panunungkulan,
Sa posisyon ay ating ihahalal.
Kaya ating tunghayan ang kakaibang serye,
Mga kwentong barbero at tsismis sa kalye,
Mga pulitikong walang iniisip kundi ang sarili,
Iwasan ang kidlat, at baka tamaan ng sangkadamakmak na mirisi.